Google AI Mode 180 ölkədə istifadəyə verildi

Google, süni intellekti gündəlik həyata daha da yaxınlaşdıran böyük bir addım atdı. Şirkət AI Mode funksiyasını artıq 180-dən çox ölkədə istifadəyə təqdim etdi. Daha əvvəl yalnız ABŞ, Hindistan və Böyük Britaniyada işləyən bu funksiya hazırda sadəcə ingilis dilində əlçatandır. Google yaxın zamanda yeni dil dəstəyi əlavə edəcəyini də açıqlayıb. Lakin, hazırda Türkiyə və bir çox Avropa ölkəsi siyahıda yoxdur.

AI Mode-a yeni funksiyalar əlavə olundu

Google, AI Mode imkanlarını genişləndirərək “agent” xüsusiyyətlərini aktivləşdirib. İlk mərhələdə bu funksiya restoran rezervasiyası üzərində işləyir. Google AI Ultra istifadəçiləri artıq süni intellektə tarix, saat, adam sayı, məkan və mətbəx seçimini söyləməklə ən uyğun restoran variantlarını əldə edə bilirlər.

AI Mode müxtəlif rezervasiya platformalarını skan edərək, məsələn OpenTable, Resy, Tock, Ticketmaster, StubHub, SeatGeek, Booksy kimi sistemlərdən ən uyğun nəticələri siyahıya alır və istifadəçini birbaşa rezervasiya səhifəsinə yönləndirir. Bu funksiya hazırda Google Labs vasitəsilə “Agentic capabilities in AI Mode” bölməsindən aktivləşdirilə bilər.

ABŞ istifadəçiləri üçün fərdiləşdirilmiş axtarış

ABŞ-da istifadəçilərə şəxsi seçimlərə uyğun nəticələr təqdim edən funksiya da əlavə olunub. Hazırda bu imkan yalnız yemək və restoran axtarışları ilə məhdudlaşır. Məsələn, əvvəllər italyan mətbəxi və ya vegan restoranları axtaran istifadəçilərə, sonrakı axtarışlarda bu seçimlər üstünlük təşkil edir.

Bundan əlavə, ABŞ istifadəçiləri artıq AI Mode nəticələrini paylaşa bilirlər. Sadəcə “Share” düyməsinə basmaq kifayətdir ki, nəticələr link şəklində kopyalanaraq dostlarla və ya ailə ilə bölüşülsün.