Qatlanan iPhone test mərhələsində

Apple-in qatlanan iPhone-u test mərhələsinə daxil oldu – buraxılış 2026-da gözlənilir

Uzun müddətdir gözlənilən qatlanan iPhone modeli ilə bağlı yeni məlumatlar ortaya çıxıb. Digitimes tərəfindən yayımlanan hesabatda qeyd olunur ki, bu cihaz artıq keçən ay prototip test mərhələsinə daxil olub. Təchizat zəncirindəki mənbələrə əsasən, Apple artıq işlək vəziyyətdə olan ilk qatlanan telefon prototipinə sahibdir.

Prototip testləri bu ilin sonuna qədər yekunlaşmalıdır. Daha sonra cihaz Mühəndislik Təsdiq Testi (EVT) mərhələsinə keçəcək. Hər şey plana uyğun getsə, qatlanan iPhone 18 seriyası ilə birlikdə 2026-cı ilin sentyabr ayında təqdim oluna bilər.

Hesabatda o da vurğulanır ki, Apple qatlanan iPad layihəsini müvəqqəti dayandırıb. Bu qərarın səbəbi həm istehsalat çətinlikləri, həm də istehlakçı marağının zəif olması ilə əlaqələndirilir.

Ən son şayiələrə görə, qatlanan iPhone modelində Samsung istehsalı olan 7.8 düymlük əsas OLED ekran, ekran altı kamera, yan hissədə Touch ID skaneri və Face ID texnologiyasının olmaması gözlənilir. Cihazın demək olar ki, görünməyən qat izi və qatlanmış vəziyyətdə cəmi 9–9.5 mm qalınlığında olması xüsusi diqqət çəkir.

Apple bu modeldə titan ərintili korpus və maye metaldan hazırlanmış menteşə istifadə edəcək ki, bu da qatlanan cihazlar üçün misilsiz dayanıqlıq təmin edəcək. Təbii ki, belə texnologiyalı telefon ucuz olmayacaq – lansman qiymətinin 2100 – 2300 dollar aralığında olması gözlənilir.